...لـو عــايز تبقـى أنســـــان...

مش عارفة ممكن اسمي الموضوع ايه او تحت اي مقدمه لكن كلمات حسيتها جوايه للانسانية او اللي المفروض يشيل لقب انسان!!!

عارف يعني ايه انسان
هتفهم معنى الكلام
وعايز تبقى انسان
يبقى حس بغيرك
راضي في الدنيا ضميرك
لو مسكت فيوم طيرك
ماتحبسوش
جناحه ماتقصقصوش
لو عايز تبقى انسان
لوعاتبت حبيبك
لو زعلت من قريبك
لو لمت صاحبك وصديقك
حسسه انك بتحبه مابتكرهوش
واما يعاتبك ويقولك
جرحك جوايه علامه
اقبل منه الملامه
متقساش متخسرهوش
لو عايز تبقى انسان
كدبت مره
اوعى كدبك يدوم
خونت وخيانتك مُره
متقولش ده قدر معلوم
هتتكشف ويومها لقدرك هتلوم
واعطف عالصغير
وابقى دايما الكبير
ده القدر لو طال قصير
ومهما عشت هتقول مش كتير
لو عايز تكون انسان
ماتبقاش سبب في دمعة
متقولش قلوب عارفه طيبتي وسامعه
حن عاللي يحبك
متجرحش اللي يودك
وافهم ان القلوب دي زي الجامعة
قلب سنة اولى
وقلب سنة تانية
قلب طاهر في الحياة جديد
وقلب يكرهك في ثانية
لو عايز تبقى انسان
بص لـ ايديك
اديت ايه للي حواليك
لو حسيت بتقصيرك
لو شرك غلبه خيرك
يبقى متبخلش بنن عنيك
ارحم وسامح
خليك مجروح
ولاتبقى جارح
واللي تعيشه النهارده
ماتقولش ده كان امبارح
لو عايز تبقى انسان
عيش بقلبك طيب
حضنك لحبيبك قريب
داوي جراحة
خليك زي جناحة
تدفيه تداويه
على كسرته تقوية
ماتذلهوش بحبك
من غير احساس
تقوله بحبك
كل ده
لو عايز بس تبقى انسان